بمشاركة [ أميرة شيخ و مرام العيسائي ] إنتاج المحتوى من فن أو برامج أو غيره يحتاج خبرة، ومو دايماً تكون متوفرة عندنا الموارد الرسمية أو الفرص المناسبة اللي تعطينا هذه الخبرة. في هذه الحالة عندنا واحد من خيارين… يا نستسلم ونقعد نحلم بحياة تمنينا نعيشها لسنوات… أو نلاقي طريقة نعلم نفسنا ونشتغل بالطول وبالعرض. والخيار الثاني هو المفهوم اللي ضيوفنا اليوم بيطبقوه في حياتهم كل يوم وبه قرروا يعيشوا الحياية الفنية اللي حلموا فيها وهم صغار. صديقة البرنامج الفنانة أميرة شيخ وصديقتنا الجديدة الفنانة مرام العيسائي شاركونا اليوم الحديث وأتكلمنا عن ”الكود سويتشيج“ اللغوي… فنانة رسمت شيكين ناجت

بمشاركة [ فيصل عسيري و ياسر ناصف ] اليوم طلعنا الرياض وقعدنا مع مستدفرنا القديم… ولدنا الضايع فيصل عسيري وشاركنا صديقنا العزيز ياسر ناصف. وفي نهار ممطر في الرياض جلسنا ندردش على مواضيع مختلفة بدأت بكروية الأرض وانتقلت لبعض ألعابنا المفضلة على البلايسيشن إلى ما وصلنا لحقوق حفظ القصص والشخصيات. وللأسف كان في مشكلة في التسجيل وبالتالي الصوت ما كان بالجودة المطلوبة، بس ما حبينا نترككم اليوم من غير حلقة… فقررنا ننشرها ونعتذر مقدماً على الجودة.

بمشاركة [ فايز مليباري ] مع السنة الجديدة كثير من الناس يحاولوا يبدأوا حياة جديدة… ومو لازم تغيير كلي، يحاولوا يتغيروا حتى ولو بجزء بسيط. لكن ليش هذه التغييرات ما تجي غير مع بداية السنة؟ جانا هذا التسائل وقررنا نناقشه مع صديق البرنامج الدافور القديم فايز مليباري اللي حكانا عن بعض التغييرات اللي هو قرر يطبقها في حياته مع بداية سنة ٢٠٢٣.

كلنا اليومين اللي راحت سمعنا عن توقيع كريستيانو رونالدو مع نادي النصر السعودي… ومع إنه فوائد هذه الصفقة على البلد له فوائد كثيرة… بعض الناس يشوفوا انه الموضوع ما يسوى الهيلمان هذا كله بالذات انه رونالدو معد صار زي أول. لكن هل احنا فعلاً نحتاج منه اليوم قدراته الرياضية؟ أو نحتاج منه خبرته العالمية أكثر؟ وهذا الكلام ينطبق بشكل كبير على كل الناس اللي وصلوا سن التقاعد في عملهم… هل تشوفوا انه خبرتهم في هذا السن أهم من قدراتهم الإنتاجية؟

بمشاركة [ مستمعي مستدفر ] مع نهاية أول سنة ميلادية تمكنا فيها من اننا ما نفوت ولا حلقة خلال ٥٢ أسبوع…  قلنا ما يصير ندخل السنة الجديدة من غير ما ننهي بحلقة خاصة نشاركها مع الناس اللي هم سبب نجاحنا بعد الله… مستمعينا الدوافير!… فدخلنا انستجرام لايف وأخذنا مشاركات ومداخلات من مستمعينا اللي شاركوا معنا أهم الدروس اللي اتعلموها خلال ٢٠٢٢ وكمان أكثر الأشياء اللي يتطلعوا لها في ٢٠٢٣. شكراً من القلب لكل ”الدوافير“ القدام اللي كانوا معانا عبر السنوات ولكل الدوافير الجداد اللي بدأوا معانا هذه السنة… وبإذن الله ربي يكتب لنا الاستمرار في… إثنين وعشرين وثلاثة وعشرين

بمشاركة [ حكيم جمعة و خالد يسلم ] لما نتعود على ممثل أو ممثلة في أدوار معينة مثلاً زي الكوميديا… صعب لكثير من الناس انهم يتقبلوهم في أدوار درامية مثلاً. على سبيل المثال الممثل الأمريكي ”آدم ساندلر“ أتعرف بالأفلام والأدوار الكوميدية، وقبل كم سنة مثل دور درامي جاد في فيلم ”أن كت جيمز“. لكن ردة الفعل كانت غير متوقعة وكثير من الناس أنبهروا بأدائه وقدر يثبت عكس المفهوم المتعارف عليه. وعشان كدة قعدنا اليوم مع الممثل والمخرج حكيم جمعة والممثل خالد يسلم عشان نناقش دور آدم ساندلر الدرامي وموضوع التمثيل وبعض المعضلات اللي الممثلين بيواجهوها… الجواهر خام والتمثيل تمام

بمشاركة [ سعيد الشامسي و صابر الغامدي و أحمد حيدر و ياسر الحربي ] لما صديقنا المبدع وأحد رواد بودكاست رووت كويست سعيد الشامسي يزور مدينة جدة… لازم نستغل الموضوع ونستضيفه في بودكاست مستدفر. بس هذه المرة ما جا لوحده وجا معاه زميلنا الرهيب أحمد حيدر من بودكاست مقهى الآنيمي وكمان عرفونا على أصدقاء دوافير جدد… الخلوق صابر الغامدي والكاتب ياسر الحربي. وحاولنا نتكلم في مواضيع ملهمة لكن كعادة سعيد قلب لنا الموضوع موت وندم. لكن في كل الأحوال الحلقة كانت متنوعة وبإذن الله حتستفيدوا منها بشكل أو آخر.

بمشاركة [ هاشم الزين ] قد في مرة كنتم بتطالعوا في تصميم في مكان أو على سجادة وشفتوا شكل وجه؟ إذا إيوة فإنتم مو لوحدكم… هذه ظاهرة موجودة عند بعض الناس ولها إسم علمي. ولها علاقة بالخيال والإلهام والإبداع… وعشان كدة اليوم قعدنا مع الدكتور هاشم الزين وتناقشنا عن عالم الخيال والإبداع اللي ناقشه في أحد أحدث مقالاته. ولا تخافوا… هذه المرة جلسنا ساعة نتكلم في الموضوع! ممكن تقرأوا تلخيص الكتاب على الرابط: https://medium.com/@hashim.alzain/how-to-find-inspiration-in-lifeless-objects-17073df20818

بمشاركة [ مستمعي مستدفر السهرانين ] اليوم قلنا نجرب شيء جديد… دخلنا انستجرام لايف وأخذنا مشاركات ومداخلات من مستمعينا اللي كانوا سهرانين معانا. وبكل أمانة جداً انبسطنا بالتجربة وشكلها حتصير عادة جديدة نسويها كل بعد فترة. بمشاركة [ مستمعي مستدفر السهرانين ] اليوم قلنا نجرب شيء جديد… دخلنا انستجرام لايف وأخذنا مشاركات ومداخلات من مستمعينا اللي كانوا سهرانين معانا. وبكل أمانة جداً انبسطنا بالتجربة وشكلها حتصير عادة جديدة نسويها كل بعد فترة.